ဒေသအတွင်းရှိ မော်တော်ကားရောင်းဝယ်ရေးတွင် ထိပ်တန်းအုပ်စုဖြစ်သည့် Cycle & Carriage သည်၄င်း၏ကုမ္ပဏီခွဲဖြစ်သော Cycle & Carriage Myanmar မှတစ်ဆင့် ပထမဦးဆုံး Mercedes-Benz Autohausအရောင်းပြခန်းကို မြန်မာနိုင်ငံတွင် ပြီးခဲ့သည့်မတ်လ ၁၀ ရက်နေ့ကဖွင်လှစ်ခဲ့သည်။ ရန်ကုန်တိုင်း မရမ်းကုန်းမြို ့နယ်တွင် တည်ရှိသော Mercedes-Benz 3S Autohaus သည် ကားရောင်းချခြင်း၊ ကားဝန်ဆောင်မှုပေးခြင်းနှင့် အပိုပစ္စည်း ရောင်းချခြင်းများကို အဓိက ဆောင်ရွက်ပေးသွားမည်ဖြစ်ပြီး ၄င်းပြခန်းသည် Cycle & Carriage Myanmar ၏အခမ်းနားဆုံးသော ပြခန်းအသစ် လည်းဖြစ်ပါသည်။
Cycle & Carriage Myanmar မှ မြန်မာနိုင်ငံတစ်ဝန်း အရောင်းပြခန်း၅ခန်း ထိ ဖွင့်လှစ်ထားပြီး Mercedes-Benz Autohaus အရောင်းပြခန်း သည် ၄င်း၏ ခြောက်ခုမြောက်အရောင်းပြခန်းလည်းဖြစ်သည်။ ခေတ်မီအပြင်အဆင်များနှင့်အတူ ၄င်းပြခန်းတွင် Display ကားအစီးရေ ၁၇ စီးနှင့်အလုပ်ရုံငယ် ၁၀ခုသာမက Mercedes-Benz iShowroom လည်း ပါဝင်မည်ဟု သိရသည်။Mercedes-Benz သည် စတုရန်းပေ၂၅၀၀၀ ကျယ်ဝန်းပြီး Autohaus Mercedes ကြိုက်နှစ်သက်သူများ အတွက် ရည်ရွယ်၍ ခိုင်မာသောရေရှည်ရင်းနှီးမြှုပ်နှံမှုဖြင့် တည်ဆောက်ခဲ့ခြင်းဖြစ်ကြောင်း သိရသည်။ထို Autohaus တွင် Mercedes-Benzဝယ်ယူသူများကို အလွယ်တကူဝယ်ယူနိုင်မှုနှင့် အဆင်ပြေချောမွေ့မှုတို့ကို တစ်နေရာတည်းတွင် ပြီးပြည့်စုံစွာ ဝန်ဆောင်မှု ပေးသွားမည်ဟုလည်း သိရသည်။
Cycle & Carriage Myanmar ၏ မန်နေဂျင်းဒါရိုက်တာ ဦးအောင်မိုးကျော်က “မကြာခင်နှစ်တွေကတည်းကမြန်မာနိုင်ငံမှာ သိသာထင်ရှားတဲ့ ပြောင်းလဲမှုတွေဖြစ်ပေါ်နေတာကို ကျွန်တော်တို့ မြင်တွေ့ပြီးဖြစ်ပါတယ်။အဓိကအားဖြင့် နိုင်ငံရဲ့စီးပွားရေးဗဟိုချက် ရန်ကုန်မြို့မှာ ပိုပြီးသိသာပါတယ်။ ဝယ်လိုအား လဲပိုကောင်းလာသလိုဝယ်ယူသူတွေအနေနဲ့လည်း ပိုကောင်းတဲ့အတွေ့အကြုံတွေကို လိုချင်လာတယ်ဗျ။ Autohaus ပြခန်းအသစ် ဖွင့်လှစ် လိုက်ခြင်းက ကျွန်တော်တို့ရဲ့ Mercedes-Benz ဝယ်ယူသူတွေကို ဆန်းသစ်ပြီးပြည့်စုံတဲ့ဝန်ဆောင်မှုအသစ်တစ်ရပ်ပေးနိုင်မယ်လို့ ယုံကြည်ပါတယ်” ဟုပြောကြားခဲ့သည်။
လူဦးရေခန့်မှန်းခြေ ၆၀သန်းရှိသော မြန်မာနိုင်ငံသည် နိုင်ငံတကာမှရင်းနှီးမြှုပ်နှံသူများ၏ စိတ်ဝင်စားမှုကိုအများအပြား ရရှိထားပြီးဖြစ်သည်။ကားပိုင် ဆိုင်မှုသည် နေထိုင်သူ အယောက်တစ်ထောင်လျှင် ခုနစ်စီးအောက်နည်းသော ကားအရေအတွက်ပျမ်းမျှဖြင့် ကနဦးအဆင့်တွင်သာရှိသည်။စျေးကွက် ထဲတွင်လည်း အခြားဇိမ်ခံကားအမှတ်တံဆိပ်အနည်းငယ်သာ ရှိနေသေးသောကြောင့် ကောင်းမွန်သော အလားအလာကောင်းများရှိသည့်စျေးကွက် လည်းဖြစ်သည်။ရေရှည်တိုးတက်မှုအလားအလာနှင့်ပတ်သက်၍ Jardine Cycle & Carriage ၏ ဒေသတွင်းအုပ်ချုပ်မှု ဒါရိုက်တာ Mr.Haslam Preeston က “ဒီရင်းနှီးမြှုပ်နှံမှုက မြန်မာနိုင်ငံရဲ့ မော်တော်ကားစျေးကွက်မှာ ကျွန်တော်တို့ရဲ့ ယုံကြည်ချက်ကို ပိုပြီးခိုင်မာစေပါတယ်။မြန်မာနိုင်ငံ အတွင်းမှာ ကျွန်တော်တို့ရဲ့ ကွန်ယက်ကို အခု ထက်ပိုပြီး ချဲ့ထွင်နိုင်မယ်လို့လည်းမျှော်လင့်ပါတယ်။ Autohaus ပြခန်းအသစ်ဖွင့်လှစ်ခြင်းက ၁၉၅၁ ခုနှစ် ထဲက စတင်ခဲ့တဲ့ ကျွန်တော်တို့နဲ့Mercedes-Benz တို့ ရေရှည်လက်တွဲမှုရဲ့ သက်သေလည်းဖြစ်ပါတယ်။ယခုဆိုရင် အရှေ့တောင်အာရှမှာMercedes-Benz ပြခန်းစုစုပေါင်း ၁၅ ခုဖွင့်လှစ်ပြီးဖြစ်ပါတယ်။” ဟုပြောကြားခဲ့သည်။
